शुक्लाफाँटामा पर्यटकको चहलपहल बढ्यो, १३ दिनमा ५९० पर्यटकले गरे भ्रमण

महेन्द्रनगर। सुदूरपश्चिम प्रदेशकै प्रमुख पर्यटकीय गन्तव्य कञ्चनपुरको शुक्लाफाँटा राष्ट्रिय निकुञ्जमा पछिल्लो समय आन्तरिक तथा बाह्य पर्यटक अवलोकन गर्न आउने क्रम वृद्धि भएको पाइएको छ।

मुलुक चाडपर्वमय भइरहेका बेला शुक्लाफाँटा राष्ट्रिय निकुञ्जको भ्रमण गर्नेको संख्या बढेको निकुञ्जका रेञ्जर विक्रम चौधरीले जानकारी दिए। करिब ३ सय ५ वर्गकिलोमिटर क्षेत्रफलमा फैलिएको निकुञ्ज विश्वमै ठूलो बाह्रसिङ्गा हुल अवलोकन गर्न पाउने निकुञ्जका रूपमा परिचित छ।

त्यस्तै मुलुकभरमै थोरै क्षेत्रफलमा धेरै पाटे बाघ भएको निकुञ्जका रूपमा समेत परिचित छ। यहाँ २ हजार ३ सयभन्दा बढी बाह्रसिङ्गा, ५० वटा पाटे बाघ, २० भन्दा बढी गैडा, साढे चार सयभन्दा बढी चराचुरुङ्गी पाइने निकुञ्ज कार्यालयले जनाएको छ।

गत असोज २८ गतेदेखि कात्तिक ९ गतेसम्म १३ दिनको अवधिमा आन्तरिक र बाह्य गरी ५ सय ९० जनाले निकुञ्जको अवलोकन भ्रमण गरेको रेञ्जर चौधरीले बताए।

‘बर्सातका बेला निकुञ्ज प्रवेश बन्द थियो। असोजको अन्तिम साता मात्रै खुला गरिएको हो,’ चौधरीले भने, ‘चाडपर्वका बेला घर आएका कञ्चनपुरसहित सुदूरपश्चिमका साथै मुलुकका विभिन्न स्थानबाट यहाँ आउने क्रम बढेको छ।’

निकुञ्ज खुला भएयता सोमबारसम्म यहाँ ५ सय ६० जना आन्तरिक, २३ जना सार्क मुलुकका र ७ जना अन्य मुलुकका पर्यटकले अवलोकन भ्रमण गरेको रेञ्जर चौधरीले बताए।

आन्तरिक पर्यटकलाई निकुञ्ज प्रवेश शुल्क प्रतिव्यक्ति १ सय, सार्क राष्ट्रका पर्यटकलाई प्रतिव्यक्ति ७ सय ५० र सार्क राष्ट्र बाहेकका विदेशी पर्यटकलाई प्रतिव्यक्ति १ हजार ५ सय रुपैयाँ शुल्क लिइने गरेको निकुञ्ज कार्यालयले जनाएको छ।

‘काम र अध्ययनलगायतका कारणले जिल्ला बाहिर रहनुभएका कञ्चनपुरका स्थानीय नागरिक पनि बिदाका बेला शुक्लाफाँटा घुम्न आउने गरेका छन्,’ चौधरीले भने, ‘निकुञ्जको प्रचारप्रसार र पर्यटक प्रवद्र्धनका लागि पनि प्रयास भइरहेकै छन्।’

कञ्चनपुर उद्योग वाणिज्य संघका अध्यक्ष दिनेश मल्लले कञ्चनपुरका पर्यटकीय गन्तव्यमा पछिल्लो समय आन्तरिक पर्यटकको भीडभाड रहेको बताए।

‘शुक्लाफाँटा, महाकालीस्थित ४ लेनको पक्की भाइरल पुल, झोलुङ्गे पुल, बेदकोट ताल र झिलमिला तालमा पर्यटकको आवागमन वृद्धि भएको छ,’ उनले भने, ‘अहिले पश्चिमी नाका गड्डाचौकी भएर भारतको नैनीताल र कैची धाम घुम्ने जाने नेपालीको संख्यामा पनि वृद्धि भएको छ।’

उनले पर्यटकीयस्थलमा आउने पर्यटकको यातायात, आवास र सुरक्षालगायतका विषयमा सरोकारवाला निकायले ध्यान दिनुपर्नेमा जोड दिए। रासस